🎣 أكلة سمك

نفسيتي بتتآكل كل لما اليوم ده بيقرب

نفسي منساش اليومين دول أبداً. على قد ما الحياة كلها بقت عبارة عن قبل اليوم ده، وبعده. على قد ما كانوا أسعد وأحزن يومين في حياتي. أكتر يومين حسيت بيهم قد إيه بحبك، وقد إيه الندم اللي في قلبي بيوصل لذروته قبل ما بيهدني.

بتكسف من نفسي أكتر لما بفتكر أنا قد إيه كنت مكسوف إني بزبط معاك إني أشوفك في شهر عسلك. كنت خايف والله إنك تكون مكسوف تقولي لأ فاكسلك من طيبة قلبك. وفي نفس الوقت قد إيه كنت متشوق إني أشوفك في عز سعادتك.

اليوم ده كنت عايز أحلق علشان كان شكلي بقى غجري بزيادة. قصاد الشارع من محل السمك كان فيه حلاق، كنت بشاور لعقلي أعدي الشارع أحلق على ما تيجوا، وانتوا جيتوا بعدها على طول فقلت الحمد لله علشان نلحق ناكل. سبحان الله. كل لما دقني بتطول وبيرجع شكلي غجري تاني بافتكر إني لما سبتها قعدت معاك وقت أكتر، فبسيبها كمان.

فاكر لما أخدتني ودخلنا نطلب السمك، وانت عارف هنجيب إيه كأنك عالم بحري. انت طلبت مشاكل المقالي (والسبيط اللي انت بتحبه وقلتلي لازم هأحبه)، وشوربة السمك اللي اتبقى منها نصها.

فاكر لما حكيتلنا على one piece اللي لحس دماغك. وconan. والfillers. وآخر لينك بعتتهولي، لينك موقع الستريمينج. وصلت في one piece لـ ٥٨٥ على فكرة، بس وراها وراها لحد ما أجيب آخرها. نفسي أكلمك عنها، وأسمع تعليقاتك لما تعرف أنا لسه بدري عليا قد إيه. بتخيل كتير، بس مفيش حاجة بتروي حرقتي إني مش هسمع منك.

فاكر لما كنت بقولك قد إيه العجلة سهلة. وياريتني ماكنتش جبت سيرتها. يا ريتني كنت ركبت معاك عجل وإحنا في الكويت. ياريتني كنت أخ أحسن ليك وإحنا صغيرين.

فاكر إحساسي لما كنت بتكلم صوفي وبتحكيلها. مش فاكر عن إيه، بس فاكر فخري وأنا بسمعلك وشايفك بتتكلم وبتضحك من قلبك. وسعادتي وطمأنينة قلبي وأنا بقولك انت هتبقى مشرف الفرح علشان قلت انت اللي هتنسق مع الأجانب لما ييجوا. مجاليش نفس أجيب حد من بعدك. كتب الكتاب اللي عملناه مكانش له طعم. البدلة اللي لبستها في فرحك ماعدتش بدخل فيها، بس ماكنتش عايز ألبس غيرها.

فاكر الهلس اللي كنا فيه على الجبل، قد إيه اكتشفت إننا زي بعض من شكوى شيرين وصوفي عننا. قد إيه ممكن ننام في أي أفشة، قد إيه ممكن ناكل في أي موقف، قد إيه ممكن نضحك على أي حاجة. قد إيه حسيت بطمأنينة إننا زي بعض. علشان والله كنت مقتدي بيك وبقلبك اللي مكانش فيه ذرة شر.

فاكر قعدتنا على البحر. وأنا حاسس بفرحتك من الstories اللي شوفناها من يوم فرحكم. وحضنك اللي كله براءة وارتياح. فاكر عصير المانجا، والجوافة. الجوافة اللي انت ما بتحبهاش.

فاكر لما قلتلي العربية اللي هنركبها هناك. فاكر لما شوفتك من ضهرك وانتوا ماشيين، وأنا بقولك سلام. من غير ما أحضنك. فاكر لما قلتلك طمني لما توصلوا. فاكر لما بعتلي قلتلي إنكو وصلتوا.

فاكر لما الراجل جه خبط على باب أوضتي.